Milli Olimpiya Komitəsindən böyük etimad: “Zirvə” “ilin ən yaxşı idman klubu” seçildi!

Ötən il “Sportsman” jurnalı “Zirvə” İdman Klubunun 2013-cü ildəki işlərini qiymətləndirərək bizi “İlin ən yaxşı idman klubu” seçmişdi. Bu dəfə isə ölkənin daha bir nüfuzlu KİV-i 2014-cü ildəki işlərimizi xüsusi fərqləndirib. Azərbaycan Milli Olimpiya Komitəsinin 2001-ci ilin noyabr ayından fəaliyyətə başlayan rəsmi yayım orqanı “Olimpiya Dünyası” qəzeti, onun “Olimpnews.az” saytı və “Olimpə Doğru” jurnalı “Zirvə” İdman Klubunu 2014-cü ilin ən yaxşı idman klubu seçib.

KİV-in saytında yerləşdirilən məlumatda deyilir: “Azərbaycanda idmana dövlət səviyyəsində göstərilən diqqət və qayğının nəticəsi kimi ölkədə idman və Olimpiya Hərəkatı inkişaf etmiş, idmanın maddi-texniki bazası sürətlə möhkəmlənmiş, atletlərimiz beynəlxalq yarışlarda çoxsaylı uğurlar qazanmışlar. Bu böyük uğurların təbliğini daim diqqət mərkəzində saxlayan olimpnews.az saytının 2014-cü ilin yekunlarına əsasən, keçirdiyi rəy sorğusunun nəticələrinə görə ilin ən yaxşılarının adları açıqlanıb”.
“Zirvə” İdman Klubu və onun beynəlxalq layihəsi olan “Zirve İnternational Sport Clubs” məhz bu siyahıda yer alıb. Bu il özünün başqa ölkələrdəki filialları arasında iki böyük ağır atletika turniri keçirən “Zirvə”, başqalarına nümunə olacaq addımlar atmış, istək və arzu olduğun yerdə nəticənin də özünü gözlətməyəcəyini sübut edə bilmişdir. 2014-cü ildə dopinq məsələsi üzündən yalnız gənclərin Avropa çempionatında tam heyətlə iştirak edə bilmiş “Zirvə”nin azərbaycanlı atletlərindən Anastasiya İbrahimli bürünc və Dadaş Dadaşbəyli gümüş, Ukraynadakı “Jidaçiv-Zirvə”nin nümayəndəsi Vladimir Hoza toplamda bürünc, Rüstəm İmanzadə isə birdən qaldırmada bürünc medalla fərqləniblər. Bununla yanaşı, cüdo üzrə Azərbaycan çempionatında qızıl medal qazanaraq Avropa Oyunlarında çıxış etmək hüququ əldə edən “İsmayıllı-Zirvə” təmsilçisi Günel Həsənlinin çıxışını qeyd etmək olar. İlin əvvəlində iştirak etdiyimiz daxili birincilik və çempionatları da nəzərə alsaq, “Zirvə” 2014-ci ildə ümumilikdə 15 qızıl, 17 gümüş və 8 bürünc olmaqla 40 medal qazanmışdır. Çox gözəl nəticədir.
Azərbaycan idmanının inkişafına, dövlətimizin idman siyasətinə öz dəstəyini tam şəkildə göstərən “Zirvə”, uğur qazanan hər bir idmançını, həmçinin onun məşqçisini qiymətli hədiyyələr, həmçinin mənzillə təltif etmiş, illərdir formalaşan ənənəsini davam etdirmişdir.
“Zirvə” İdman Klubu Azərbaycanın lider klublarından biridir və əldə etdiyimiz uğurlar, gördüyümüz işlər göz qabağındadır. Ölkənin ən böyük idman qəzetlərindən olan, nüfuzlu “Olimpiya dünyası” qəzetinin klubumuzu “İlin ən yaxşı idman klubu” elan etməsi xəbərini böyük sevinclə qarşıladığımızı bildirir, jurnalist dostlarımızın, Milli Olimpiya Komitəsinin bu etimadını növbəti illərdə də doğrultmağa çalışacağımıza söz veririk. Ümid edirik ki, “Zirvə”nin fəaliyyəti bundan sonra diqqət mərkəzində qalacaq.
Klubumuzun hər bir üzvünü, bu ümumi uğur münasibətilə təbrik edirik!

SHARE